Followers

Wednesday, August 19, 2015

نبذه عن أكثر المشاكل التي تؤرق المجتمع الأمريكي

أكثر المشاكل التي تؤرق المجتمع الأمريكي و الإختلاف في بين سياسة الحزبين الجمهوري و الديمقراطي في طرق حلها 



مشاكل الامريكان حاليا :
المهاجرين الغير شرعيين اللي بييجوا من المكسيك و ياخدو وظايف الامريكان
لانهم عماله رخيصه و ملهمش ورق و تامينات.

المشكله التانيه اللي بتؤرق الشعب الامريكي هي الارهاب اللي بيستهدف الامريكان ف 
الداخل و الخارج.

المشكله التالته هي الجدل حولين هل نمنع المراه الامريكيه من حق اجهاض الحمل و 

تعاقب قانونا ولا نعتبرها حريه شخصيه لا تعاقب عليها، الجمهوريين كلهم عايزين 

يمنعوا الاجهاض الا في حالات تهديد حياة الام او الاغتصاب بينما الديمقراطين 

شايفنها حريه شخصيه .

المشكله الرابعه الجمهوريين عايزين يلغوا قانون السماح للمثليين بالزواج لانهم مؤمنين ان ده حرام بينما الديمقراطيين شايفنها حريه.

المشكله الخامسه وثيقة التامين الصحي اللي عملها اوباما عشان يساعد الفقرا الجمهوريين شايفنها كارثه بتهدد الاقتصاد و طالبين وقفها.


المشكله السادسه ان من الشعب الامريكي اللي مهتم بالسياسه الخارجيه غضبان من اوباما عشان ايد وصول الاخوان لحكم مصر، بعد فشل الاخوان و اطاحة الشعب المصري ليهم و ظهور داعش ف المنطقه و تهديدها لامريكا امريكان كتير قالو اوباما خلانا مسخرة العالم.

المشكله السابعه الضرايب،طبقه بتدفع ضرايب كتير جدا و طبقه بتستفيد منها كمعونات و بتسئ استخدامها احيانا ، الحزب الجمهوري دايما عايز يقلل ضرايب الاغنيا و يزودها علي الطبقه المتوسطه بينما العكس للحزب الديمقراطي.

مرشح الحزب الجمهوري للرئاسه الأمريكيه ،دونالد ترمب ، و إلي واخد أعلي تصويت حتي الأن ، اقترح حلول مثل  هيبني سور و يغصب علي المكسيك تدفع تمنه ،و قال لو المكسيك رفضت هيفرض ضرايب عاليه علي كل البضايع اللي بتيجي من المكسيك بشكل شرعي يعني بغباؤه هيعاقب الملتزمين بالقانون.

راند بل ،أيضا أحد مرشحي الحزب الجمهوري للرياسه ،قال لو مسك الحكم هيقطع كل المعونات عن إسرائيل و مصر.
أما جيب بوش فمن خططة دخول أمريكا العراق و الحرب مره أخري !






Monday, August 10, 2015

هل يحمي الحجاب المرأه من التحرش ؟ اقرا تجربتي بين مصر وأمريكا




اذكر موقف شفته في اول شهور الهجره لما كنت ساكنه في معسكر الجامعه و مجموعه من الشباب ماشي و جاي عليهم مجموعة بنات لابسين شورتات ، توقعت ان اكيد الولاد هيعاكسوا البنات دول زي ما انا بشوف في مصر دايما ، لكن البنات عدوا من جنبهم و الولاد ولا حتي نظره ! فضلت فتره متلخبطه و مش قادره اصدق ان ممكن يحصل ان جروب بنات ماشيين بشورتات ميتعاكسوش من جروب ولاد جاي عليهم، مع مرور الوقت عرفت ان معطم الرجال هنا مهذبيين و طبعا المقارنه بدات في دماغي بين اللي شفته هنا و بين اللي شفته في مصر لما كنت محجبه بلبس واسع و مفيش مكياج و مع ولادي و بتعاكس برضه! بعدها اتعودت اني امشي في الشارع و محدش يبص و لا يتحرش و اصبح ده العادي و بالتالي لما بروح مثلا اماكن العرب استغرب ليه بيبصوا و يعاكسوا ؟ اما بقي اني اكون ماشيه و واحد جاي في وشي و يبتسم كتحيه سريعه و انا ابتسم في المقابل فدي عاديه في امريكا ، اما في مصر نفس الموقف بيتفسر وحش ، و بالتالي أأمن بلاد تعيش فيها المراه م غير خوف من التحرش هي بلاد الغرب و ليست بلاد المسلمين ، واضح ان بلاد المسلمين محتاجه اعادة تاهيل للذكر. 
من اقوي الاسباب اني بحب امريكا جدا اني بمشي براحتي في الشارع و المواصلات و بتعامل مع الذكور بدون خوف من التحرش او الفهم الخاطئ لتصرفاتي ،و حتي الان معرفتش احل معضلة بتعاكس و انا محجبه في بلاد المسلمين،بينما في الغرب امشي منغير حجاب و مفيش معاكسه لا ليا و لا للبنت اللي بشورت.
اول مره شفت فيها طالبات الجامعه نايمين علي النجيله بالبكيني ادام مبني شؤون الطلبه قلت نهار اسود دول اكيد هيغتصبوا ! لكن من مراقبتي ليهم يوميا لقيت محدش بيبص حتي عليهم مش يبحلق،طبعا منكرش ده كان كتير اوي علي عقليتي كواحده جايه من العالم العربي، بعدها خلاص استوعبت بقي الثقافه هنا اد ايه راقيه و الرجال مهذبيين لحد كبير جدا منغير لا حجاب و لا نقاب و لا غيره ، هي تربيه و مجتمع فعلا .
يعني مثلا ليه مبيجيش في دماغ الولد في امريكا ان البنت اللي بتتشمس بالبكيني في جنينة معسكر الجامعه انها عايزه تتعاكس ؟ اكيد ان اللي بيتحرش في امريكا معرض للسجن طبعا لكن اللي انا شفته ان الرجال لوحدهم مبيتحرشوش مش من باب الخوف لكن الاحترام .
اي واحده مسلمه محجبه تهاجر من بلدها لامريكا هتدرك علطول ان الحجاب مبيمنعش التحرش و ان مجتمعاتنا ظالمه للاناث و بيعاقبوهم علي شهوة الرجل.
في مدرسة بنتي كل سنه بيبعتوا لاولياء الامور الشكل المقبول لملابس البنات و الولاد،مثلا الشورت ميكونش قصير اوي القميص مش مفتوح اوي، حتي المجتمع الامريكي ليه حدود في قبول شكل لبس المراه ،يعني لو واحده لابسه شبه عريانه دي بتنتقد جامد و بظنوا انها عاهره .
للاسف شفت شباب مصري واضح لسه مهاجرين جديد و تلاقيهم واقفين يبحلقوا في الستات بطريقه مخجله فعلا طبعا منغير ما اسالهم معروف دول عرب .
في النهايه لسه بتمني يجي يوم علي كل بلاد العرب الستات يحسوا بامان من التحرش و ميخافوش من المشي في الشارع و المواصلات و التعامل مع الذكور.