Followers

Monday, April 18, 2011

نظام التعليم اللى البرادعى قال انه هايغيّره ( 3 ) -الجزء الثالث

حكايات عن مدرسين دخلوا السجن و اتفصلوا بسبب اعتدائهم على حقوق الطفل و عدم الالتزام بالقانون الامريكى

فى امريكا كل فتره كده بنسمع فى الاخبار المحليه عن مدرس او مدرسه تم القبض علييه بسبب انه لمس طفل او بعت رساله فيها ايحاءات جنسيه لاى من الطلبه او طبعا ضرب طالب.عايزه اقول ان ده عادى هنا فى امريكا .
من المراات المشهوره , مدرسة كى جى ٢ شتمت الاطفال بتوعها داخل الفصل لما قالت
 You are stupid kids,I swear to God !


اللى اكتشف الموضوع ام و اب بنتهم كانت فى الفصل بتاع المدرسه دى .لما لقوا بنتهم بترجع كل يوم مبوزه , حطوا جهاز تسجيل فى شنطة البنت .الجهاز فضل يسجل سبع ساعات لحد ما لقط جمله واحده المدرسه قالتها و هى
 You are stupidالام و الاب اخدوا الجهاز و على البوليس عدل.تم فصل المدرسه و كمان جابوا الام و الاب فى جود مورنينج اميريكا يحكوا اللى حصل.
واقعه تانيه , معلمه ثانوى كان عندها بلوج, مدونه, كتبت فيها رايها الحقيقى فى الطلبه بتوعها ,انهم اغبياء و كسالى.لما الطلبه و اولياء الامور شافو الكلام ده مكتوب, بلغوا نقابة المعلمين و تم ايقاف المعلمه دى عن العمل.ده الخبر فى اللينك ده
http://news.yahoo.com/s/yblog_thelookout/20110210/us_yblog_thelookout/teacher-suspended-over-personal-blog-rant

و دلوقتى بقى كل واحد فيكم يحاول يفتكر لما كان لسه فى المدرسه ,كام مره سمع المدرس بيشتم ؟ كام مره شافوه بيضرب ؟ بالذمه مش كان نفسكم لو كانت القوانين الصارمه دى موجوده فى مصر ,كانت تمنع اى اهانه او ضرب اى واحد فيكم اتعرضها من معلم او معلمه ؟
فاكرين حكاية الطفل اسلام اللى مات من الضرب على ايد المدرس بتاعه؟ لو مش فاكرين ,ادى الفيديو اهه :
http://www.7be.com/vb/t128294.html
ياترى لو كانت القوانين دى مطبقه فى مصر ,مش كان اسلام لسه عايش ؟ انتوا قولولى !

ده فيديو  مؤثر جدا لطفل يعذب نفسيا في مدرسة في الاردن:
http://clipat.maktoob.com/video.php?video_id=378630


طبعا اللى فات ده  مجرد امثله عشان تقيسوا عليهم ازاى المجتمع فى العالم الاول بيربى الانسان على الكرامه و يغرز فييه مبدا هو الاحترام من الصغير و الكبير كمان.بكده يطلع الطفل لما يكبر ميسمحش لاى شخص مهما كانت له سلطه علييه ان يهينه او يعتدى على حقوقه. من هنا الانسان المصرى هيبدا عصر جديد لما هيخلق اول جيل متربى بهذه الطريقه , و من هنا هنبدا ننطلق .لذالك الدكتور البرادعى شدد على اهمية تغيير نظام  التعليم و ده لما تحدث عن الانسان المصرى و كيف ان الدكتور البرادعى هيحوله من العبد للحر.
كل اللى فات ده , قوانين حماية الطفل من اولياء امره , قوانين حماية الطفل من المعلم , ده احد العناصر الاساسيه ضمن خطة تغيير نظام التعليم الذى تحدث عنه الدكتور البرادعى.

قوانين هتحكم دكاتره و اساتذة الجامعات
اضافه الى قوانين حماية الطفل فى المدرسه , هنزود عليها قوانين زياده لحماية طالب الجامعه من سوء استخدام الاستاذ اجامعى لمنصبه.

كلنا عارفين ازاى دكاترة جامعات مصر ,كتير منهم, بيجيبوا امتحانات تعجيز للطلبه ,غضبا من ان الطلبه كتير منهم مبيحضرش المحاضره بتاعت هذا الاستاذ , او لما يعرف ان الطلبه بيشتكوا منه لانهم مش فاهمين حاجه من شرحه ,او غضبه لمجرد ان الطلبه بيتكلموا كتير فى وقت المحاضره او...او....او.....
انا متاكده ان كل واحد فيكم مر بحكايات و شاف مهازل من اساتذة الجامعات للطلبه بتوعهم.
انا لا انسي احد اساتذتى, لما كنت بدرس فى هندسه القاهره , لما رد على طالب و قاله ," يابنى استاذ الجامعه يجى بعده ربنا على طول ,هتروح منى فيين ؟ "
العهد ده هينتهى باذن الله بتطبيق هذه القوانين :
استاذ الجامعه بيتكتب فييه تقرير من الطلبه كل اخر ترم ,شرط يتكتب بعد الانتهاء من امتحانات الترم و رفع و تسجيل الدرجات , و يتكتب بعدم ذكراسامى اى طلبه.
التقرير بيكون عباره عن استطلاع راى الطلبه فى طريقة شرح هذا الاستاذ الجامعى ,هل ملتزم بمواعيده ؟ هل بيتحدث باحترام مع الطلبه؟ هل لما الطلبه بيرحوله مكتبه فى المواعيد المحدده طلبا للمساعده فى الماده ,هل بيلاقوه موجود ؟ هل يبوفر للطلبه كل المصادر الخاصه بمذاكرة الماده ؟  واى اسئله تاتيه تيجى فى دماغكم.
بناء على التقرير ده , بيتحدد اذا كان استاذ الجامعه ده هيكمل الترم الجاى  و لا بالبلدى كده " هياخد صابونه...." ؟
من تجربتى الشخصيه , شوفت بعينى و عشت ازاى دكتور الجامعه فى امريكا مؤدب جدا مع الطلبه و بيحترمهم على الاخر و يحببهم فى الماده بتاعته كمان. للاسف القوانين هى الحاجه الوحيده الرادعه للانسان , افضل من الاعتماد على اخلاقه و خوفه من ربه.
انشاء الله لو الدكتور البرادعى اصبح رئيسا , هيطبق هذه القوانين اللى هتنهى العهد السعيد بتااع اى استاذ جامعى بيستحلى ذل الطلبه و التحكم فيهم على حسب مزاجه ما يقوله.


 .
الدكتور البرادعى هو الرجل الذى عاش ثقافتين , ثقافة العالم التالت و ثقافة العالم الاول و بذالك هو الذى سيعبر بمصر الى العالم الاول.

الموضوع الجاى هكتب عن تجربتى الشخصيه لما اشتغلت هنا فى امريكا فى مدرسه كلها عرب مهاجرين ,يعنى الطلبه من اباء و امهات اتربوا فى الشرق, و مدرسه تانيه كلها امريكان من اباء و امهات اتربوا فى امريكا.الفرق بين الاتنين مذهل !!!! و فعلا بيثبت مساوئ التربيه فى العالم العربى و تاثيرها السلبى على المجتمع الامريكانى.
انتظرونى قريبا..