كيف يفكر البرادعى فى مستقبل مصر

كيف يفكر البرادعى فى مستقبل مصر

انا مصريه هاجرت لامريكا مع زوجى لدراسة الدكتوراه , هو مش انا هههههههه
المهم انى عندى تصورلشكل الحياه فى مصر لو اصبح البرادعى رئيسا.
التصور ده جيه من ان اى مصرى عاش فى بلد زى المانيا او امريكا , بيشوف و يعيش كل حقوق الانسان اللى المصرى بيحلم بيها , و بالتالى بيكون نفسه يطبقها فى مصر . فما بالكم لو واحد من المصريين دول رجع مصر و جتله الفرصه انه يترشح للرياسه ؟
تخيلوا بقى انتم !
لكن انا مش عيزاكوا تتخيلوا , لا , ده انا عايزه احكيلكم و انقل لكم كل الحاجات الحلوه و القوانين و الانظمه اللى , على ما اعتقد , الدكتور البرادعى عاشها بره و عايز يطبقها فى مصر.
تعالوا اكلمكم الاول عن الفقر و الناس اللى عندها اطفال و مش لاقيين ياكلوهم اكل صحى , و الناس اللى راميه ولادها فى الشارع يشحتوا طول النهار .ازاى امريكا تخلصت من كل القرف ده ؟ هقولكم.
فلوس الضرايب اللى كل الناس بتدفعها فى امريكا بتروح فى حاجات كتير , و بالمناسبه بتروح للمعونات بتاعت مصر , طبعا انا بدفع ضرايب زى كل الناس هنا .المهم بتروح كمان فى الاتى :
اى ام حامل من محدودى الدخل , يعنى لو على او تحت خط الفقر, تجيب ما يثبت ده , يقوموا يصرفولها شيكات تشترى بيها اكل كل شهر , بحيث ان الاكل ده يكفيها كواحده حامل , و يكون اكل صحى .يعنى الشيك بيكون مكتوب فييه نوع الاكل , مثلا الشيك ده هنا فى امريكا بيكون فييه الاكل ده : ( انا عارفه لانى عشت فتره علييه )
جبنه شيدر حجم معين ,٢ جالون لبن ابيض , زبدة فول سودانى , عصاير اى نوع خالى من مكسبات الطعم,علبة بيض ١٢ بيضه , كورن فليكس ,كيس عيش توست كبير , علب تونه , و غيرها
..... ,
فى كمان شيكات اكل اضافيه لو الام دى عندها اطفال اقل من ٥ سنين.
كل طفل لييه نفس شيك الاكل ده و كمان لو الطفل ده مثلا عنده حساسيه من اى نوع من الاكل اللى فى الشيك , بيبدلولوا بالاكل المناسب لصحته.
كمان لو الطفل عنده انيميا مثلا , بياخد اكل اكتر فى الشيكات .الاكل ده كمان بكون فيه كل حاجه , يعنى لحمه ,فراخ ,رز ,فاكهة و خضار ..
و ايضا , و شوفوا الحلاوه يا امهات , البيبى اللى اهله على او تحت خط الفقر , بيتصرفله لبن صناعى و يكون المناسب لييه مش اى حاجه , لحد ما يستغنى عنه.
.
و بالمناسبه دى اعتقد ان سوزان مبارك كانت عامله برنامج زى ده بس اظن كانوا بيصرفوا اللبن لمدة سنه واحده.
لو الام حامل و عندها مثلا اربع خمس عيال , يتصرف شيكات اكل بعددهم كلهم و هى معاهم. عايزه اقول هنا , اننا لو طبقنا ده فى مصر هنقلل عدد الشحاتين و اطفال الشوارع.
بس لحظه , ده لوحده مش كفايه لان فى امهات و ابهات طماعين و بيرموا ولادهم يشحتوا عشان عايزين فلوس زياده.و عشان كده فى قانون بيقول ان لو اى طفل ظهر فى الشارع بيشحت , او اى طفل امه و ابوه خرجوا من البيت و سابوه لوحده و حد من الجيران بلغ البوليس , او لو اى ام او اب كان واقف فى محل او شارع او مكان عام , و بيضرب او بيزعا بس لابنه او بنته , البوليس بياخد الام او الاب للتحقيق و بياخد الطفل يحطه فى دار رعايه , لحد ما الام و الاب يتعهدوا بعدم تكرار ده تانى , و ده بيعتبر حمايه للطفل و حقوقه .
.و لو الام و الاب اعادوا الكره , بيتسجنوا المره دى .
انا عايزه اقول هنا ان القوانين دى فعاله و ناجحه جدا هنا , و بالفعل انقذت ملايين الاطفال من الام والاب القاسيين و المهمليين لاطفالهم.
احنا عندنا فى مصر الضرب و الشخط و احيانا بعض الشتايم , زى مثلا يا عبيط او يا غبى , بنعتبرها ال ايييه هى دى طريقة التربيه الصح .....للاسف و للاسف الشديد ان احنا كده بنهين ولادنا و بنضعف ثقتهم فى نفسهم , و ده بياثر فى شخصياتهم لما يكبروا .
انا متاكده ان كل السنين اللى فاتت دى , اللى المصريين كانوا متخاذلين فيها عن مطالبة حقوقهم , من احد اقوى
لسه هكمل .....انتظرونى ।
دلوقتى لو رحعنا للاديان هنلاقيها كلها بتحث الاباء و الامهات على احترام ابناءهم و زرع الثقه فى النفس ز اللى انا شفته ان احنا فاهمين الكلام ده بس مش عارفين " ازاى نترجمه لفعل" او يمكن التعبير الادق هو اننا بنترجمه لافعال خاطئه بتؤدى لنتيجه خاطئه و منبقاش فاهمين اشمعنى الناس فى الغرب فاهمين حقوقهم و ازاى بيطبقوا الاسلام و هم ميعرفوهوش؟
للاسف احنا مفهومنا عن التربيه خاطئ .

هى دى طريقة المجتمعات العربيه فى تربية الاطفال :

لما الطفل بيعمل غلطه بنحذره انه ميعملهاش تانى و لما بيعملها تانى للاسف يا اما بينشتم او ينضرب ظنا من الام او الاب ان دى هى الطريقه الرادعه اللى مش هتخليه يعمل كده تانى و بينما فى حقيقة الامر ان اللى مبيخلهوش يعمل كده تانى انه مش عايز يسمع شتيمه و لاينضرب تانى و و هنا للاسف الهدف من انه يفهم غلطه لم يتحقق و انما الذى تحقق هو الالتزام النابع من الخوف من اللى هيحصله لو مسمعش الكلام।
يعنى لما المره الجايه هيخرج مع امه و ابوه هيبقى خايف يتكلم او يعبر عن رايه ادام الناس احسن بتعرض لاحراج او اهانه من الام او الاب او حتى من الناس نفسهم।ده تاثيره وحش على تكوين شخصيته , ممكن يطلع شخص مش عارف يكون راى فى اى حاجه لانه دايما معتقد ان فى من هو احسن تفكيرا منه و بالتالى بنشوف ناس كتير وان لم يكن معظمهم ماشيين مع الناس , زى ما الناس تعمل يعملوا. .
و برضه ده يخلى الشخص ماشى ورا كلام الناس و اشاعاتهم كمان , من غير ما يحاول تقصى الحقائق بنفسه .لذلك احنا شوفنا ازاى الناس كانت معتقده ان البرادعى هو اللى دخل امريكا العراق , مع ان الفيديو اللى اثبت عكس ده تماما , كان موجود على الانترنت من زمان لكن و زى ما ذكرت , اسلوب تربيتنا الخاطئ هو اللى ادى الى ان معظم الشعب يثق فى كلام رموز الشعب اكثر مما يثق فى نفسه.
.